قصتي يوم يخطبني مدرس الدين اللي يسمع سلوو ميوزيك

هذي قصه غثتنا فيها اختي بطلة هذه القصه 

 والكلام طبعا لها :

 ابقول لكم سالفه صارت لي قبل (....... )سنين وانا بثالث ثانوي

كان ياماكان فيه بنيه وش ملحها اسمها انا كل يوم تروح

 وتجي هي وأخوها الصغير للمدرسه مع السواق تنزله
 لمدرسته قبل تروح لمدرستها والظهر تمر تاخذه ..الى هنا كل شئ عادي

مره من المرارير طلعت من المدرسه حايمتن تسبدي من آخر حصه وتافلتن العافيه من حصة الفيزياء

اعنبوا بليس مدرستنا من اول الترم وهي ماسكتن قطيعة حديده تحاول تقنعنا انها زنبرك

المهم طلعت من المدرسه وانا عند باب مدرسة اخوي مناحي ( يقال انها تموه بالاسم )

لقيت مجموعة عيال يمكن بصف سادس واول متوسط متجمعين على بزر يطقونه الله لا يعاقبنا

وانا اناظره رحمته قلت يا ويلهم من ربي وراهم ياكافي يتجيودون على
 ذا الضعيف بس ما قدرت اتدخل صعبه مع اني اتحقرص ودي احلتهم بالحصا

شوي حاولت اشوف الولد وشو من لحيه كود انه يطقهم الا حدثت المفاجعععه طلع أخوي  منااااحي

فجأه حسيت ان فيه قوه دبت فيني وصرت بات مان مهوب وومن وانزل بدون تفكير انا وسواقنا هالعود رجلن بالارض ورجلن بالقبر واتوجه للعيال اثنين شادين يدين اخيي والباقين يطققونه طبعا انا مطبقه دور بات مان عبايتي تطير من ورا

وأجيهم وامد لساني عليهم ياماااااااااااااال الوجع فكووووه فك الله رقابكم

الا ويتناحشون ماشوف الا غبارهم... خااافو الظاهر يحسبوني سكني طالعن من الارض

المهم اخوي يوم شافني طلعت العضلات خذ حصاة من الأرضقلت انا : ايييييييييييييوه حطها بعينه فقع وجييييييييييييييييييهم و...

وأخوي متحمس  وانا: يلاااااااااااااا انطلها بس انتبه لاتطلع دمانهم شوي الا الحصاة اللي نحلف عليها تحت رجلينا   يقال انه رماها المهم جيت واشد واحد صغير من جيبه ليش تطقه الولد يصيح ويقول : انااااااااااااااااااا مش معااااااااااااااااااااااااهم انا صديييييؤوووووووه كح كح   شرققلت انت من انت : سيبيني انا صديؤؤؤوه قاي ادافع عنه

المهم بعد جهد جهيد بشرح الحاله فكيته طلع صديق اخوي المصري وبعد كم سؤال للولد ومحاولاتي لفهم السالفه خذت اخوي الصغير ولميته دخلنا السياره .. ادور السواق لقيته واقف يتفرج على المصري ويدينه على خصره ويقول

كلوووه نفر سعودي مجنووون ..انا : انت ورا ماتجي لا يجيك حقك وبعدين رحنا للبيت ...ما انتهت السالفه انا اعتبرها بتبتدي الحين جا من بكره يوم جيت آخذ اخوي مناحي من المدرسه وانا انتظره بالسياره فجأه

جا أخوي ومعه شاب في مقتبل العمر ماسكه من يده انا ارتعت ياربييييييييييييه وش فيه اخوي زود يومن كلن يتعرض له ؟؟؟؟ مافيه الا بياضه والا وجهه سلطه انا احسبه بينخطف بغيت انقلب سبايدر مان بس اشوى اقبلوا على سيارتنا   

وودعه الرجال ودخل اخوي السياره ..انا سويت ثقل ولا سألت اخوي ..

الى ان تعدينا الملف ونشبت بخشمه منهو ذا ؟؟؟؟؟قال : هذا استاذنا الدين قلت : آها الله يجزاه خير

ورجعنا للبيت .. ما انتهت القصه اصبرو  ؟؟؟!!جا الصبح وحنا بطريق المدرسه جت سياره جنب سيارتنا عند الاشاره مروق راعيها على الصبح حاطن سلو ميووووزك وكاشخ بالغتره اللي اعماني بياضها

وأخوي يناقز بالسياره كنه قريد (تصغير قرد ) استاذ الدين ..استاذ الدين ..انا : متأكد انه مدرس دين

المهم انا منيب فاضيتن له عندي اختبار كيمياء جلست اراجع ..ورشدي اباظه جنبنا بالسياره عايش جو

ومر اليوم وجا الظهر وجا رشدي اباظه مع اخوي مناحي للسياره وهالمره صار فيه حبحبه

حب أخوي وودعه وركبه السياره انا بخاطري : خييييييييييييير كنك تموووون يالأخو

بس قلت يابنت الحلال أحسني النيه يمكن عشان خايفن عليه لايجلد من العيال  كل شي جايز

المهم مر يومين .. ويرن التلفوون ونتسابق انا وأختي عليه   ياقدمنا

وأفوز طبعا خصوصا بعد تمارين الإحماء اللي سويتها بمدرسة أخوي واسمع صوت انثوي تشوبه لكنه حجازيه ..السلام عليكم

انا: هلا ...هي : كيف الحال ..انا : بخير هي : الوالده موجوده بغيت اقول انا الجده.. انا الوالده .. بس ابي أعرف وش تبي ذا الحرمه من أمي المهم ناديت أمي وخذت أمي السماعه ودار هذا الحديث بعد المقدمات الاعتياديه:

امي : فيه عندي بنتين وحده بالجامعه ووحده بثالث ثانوي وجه امي تغير تبون اللي بالثانوي ؟؟؟؟؟احس فيوز مخ أمي ضربت وش معنا اللي بالثانوي ؟؟؟امي : بس ودي أعرف وشلون عرفتونا ومن اللي دلكم علينا شكل المره غبت السالفه لان وجه امي ماتغير

بس امي انهت الموضوع لما قالت والله كل البنتين فايتات الاولى متملكه والثانيه

مخطوبه لولد عمها   اللي هو زوجي الحين بس كانت الضربه القاضيه لما سكرت امي التلفون وطبيت انا بحضنها مسويه فيها البنت الدلوعه يمه وش السالفه؟؟؟ امي: وججججججججججججع فغصتيني   ..هاه يمه وش السالفه ؟؟؟

امي وهي مسكره عين وفاتحه عين   امي اذا سوت كذا يعني اللي قدامها ملعون خامسه

امي : تقول انها ام مدرس اخوتس ؟انا وبكل فهايه : مدرس الدين ؟؟؟؟ امي : وش درااااااااااتس ؟؟؟

انا : يمه لاتروعيييييني مهوب لازم ترفعين حواجبتس عشان ادري انتس معصبه اصبري اقول لتس السالفه ..

تذكرين سالفة اللي طقوا اخوي ؟؟؟امي: ايه انا : وسالفة ذاك الاستاذ اللي صاير يجيب أخوي للسياره وجلستي تدعين له

امي: ايه ..انا : ربي استجاب دعاتس وجا خطبني امي بعد ماتغير وجهها ورجعت للأم الحنون ياسبحان الله يابنيتي

انا: هاه وشو يد تحت ذقني ورافعه حواجبي يقال اني منسجمه مع السالفه

امي : هذا اكيد يابنيتي شافتس يوم تدافعين عن اخوتس وشافتس بنية عاقله ومحتشمه

انا : ايه صح يمه حتى مع الأغراءات بالسلو ميوزك كل صبح بس تعرفين تربيتس لبنتس

امي: سبحان الله اعجبته اخلاق البنت وهو ماشاف وجهها انا ومسويه فيها صديقه لامي : اجل لو شاف وجهي تسان جاب قبيلته

امي  ناظرتني بعين حمرا.انا : امزح امزح كملي مدح امي : حسافه لو ما انتي مخطوبه لولد عمتس كان وافقت على ذا اللي يخاف الله واقول بخاطري : مافات شي يمه طبعا من بعد الرفض معاد شفنا غترته

وجا الظهر وصار اللي يجيبه مدرس الرياضه ومن بعد هالسنين اخوي ما يحب ذا السالفه لان فيها جرح لمشاعره

وكل ماتهاوشت انا وزوجي اقول بخاطري لو اني ماخذتن الحجازي كان الحين

بالسياره اسمع سلو ميوزك بس الله يخليه لي هو وأخوي وأمي وأبوي وخواتي بنات عبدالغني شربت

وبس انتهت السالفه وياليت تتعضون يا بنات عشان تعرفون ان اخلاق البنت هي اساس اعجاب

الرجل فيها ..احسكم كلكم بتجيبون بكره  اخوانكم من المدرسه

ملاحظه : صديق اخوي المصري يشتغل حاليا مدرس لولدي في اول ابتدائي

ـــــــــــــــــــــــــــــــــــــــــــــــــــــــ